• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Tvísygul (tvísygulsættin)Diplecogaster bimaculata bimaculata
(Bonnaterre, 1788)

Stødd: Tvísygul verður upp í 6 cm langur.

Dýpi: Hann er lítið kendur, men er fingin úr 5-10 metrum niður á meiri enn 100 metra dýpi.

Litur: Hann hevur skiftandi litir, tó oftast sera skínandi. Oftast er hann reyður við nógvum bláum, viólbláum, brúnum og gulum blettum. Hann hevur oftast ein stóran reyðan ella dimman blett á hvørji lið, beint aftan fyri uggafjøðurina.

Teinar: R 5-7; G 4-6; U 23 (+); St 9-10.

Lýsing: Búkfjaðrarnar eru umskapaðar til ein tvídeildan súgvikopp fremst undir búkinum. Hann hevur eina ryggfjøður aftarlaga á sporlinum, og ein, heldur minni, gotfjøður er beint undir. Hann hevur stórar uggafjaðrar, tætt teinaðar í ovara parti, ótættari niðari, og avrundaðan stert. Høvdið er at kalla tríkantað. Hann hevur smá táknaop og langt sporl. Kroppurin er breiðastur um uggafjaðrarnar.

Eyðkenni: Støddin og tvídeildi súgvikoppurin.

Týdningur: Tvísygul hevur ikki vinnuligan týdning.

da: Toplettet dobbeltsuger, en: Twospotted sucker, fr: Lepadogastere a deux taches, no: Dobbeltsuger, tý: Ansauger

Útbreiðsla: Í Føroyum er hesin fiskur bert skrásettur einaferð. Undir Noregi er hann frá Tróndheimi til Skagerrak. Hann er vestan fyri Bretsku Oyggjarnar til Gibraltar, í Miðjarðarhavinum eystur í Adriahavið. Hann er við Asoroyggjarnar, Grønhøvdaoyggjarnar og Kanariuoyggjarnar.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017