Sólfinn Hansen, PhD-stipendiatur á Føroyamálsdeildini á
Fróðskaparsetri Føroya

Størsti parturin av íbúgvunum í heiminum hava eina fatan um heimsins og jarðarinnar uppruna, sum tekur støði í teirra mentan og/ella átrúnaði. Náttúruvísindini hava hinvegin leingi roynt at frágreiða heimsins uppruna leyst frá mentanum og átrúnaðum. Í fyrilestrinum er ætlanin at koma inn á hesar munir og at lýsa ymiskar uppfatanir av alduri jarðarinnar og alheimsins ígjøgnum søguna. Nortið skal vera við munir ímillum náttúruvísindini og hugvísindini á hesum øki við støði í tulkingarfrøðini (hermeneutikkini), og mett skal vera um tann týdning, spurningurin um jarðarinnar og alheimsins uppruna hava havt fyri vísindagreinarnar.