• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaðo.

Úlvfiskur (úlvfiskaættin)
Lycodes esmarki Collett, 1875

Stødd: Úlvfiskur er størstur av úlvfiskunum. Hann verður í mesta lagi 90 cm langur, men vanliga longdin er 50-60 cm.

Dýpi: Hann er botnfiskur. Hann er úr umleið 150 metra dýpi niður á meira enn 1100 metra dýpi, hann er í sjógvi millum ÷3° og +5°C.

Litur: Úlvfiskur er reyðbrúngráligur um bakið, ljósari undir búkinum. Tvørtur um bakið og niður á síðurnar hevur hann 5-7 ljós grálig bond. Hesi bond skifta skap við aldrinum. Á ungum fiski er bandið tvídeilt í neðra. Á eldri fiskum verða hesi bondini tvídeild heilt uppígjøgnum, brúnur litur er inni í bondunum. Á eldri fiskum kann hetta minna um ketumynstur. Hann hevur svart royggj.

Teinar: U 22-23.

Lýsing: Úlvfiskur er langur og smidligur fiskur. Hann hevur tvær strikur. Onnur er eftir miðjuni og hin niðast á síðuni. Tann ovara er ofta kám og ring at síggja. Ryggfjøðurin og gotfjøðurin renna saman í ein spíss aftast, so at eingin stertur er. Hann hevur stórar, rundar uggafjaðrar og smáar búkfjaðrar. Roðsla er upp á nakkan, upp undir ryggfjøðurina og við uggafjaðrafestið. Av gronini aftur til fremra enda á gotfjøðurini er um 38-41% av heildarlongdini, og kropshæddin við fremra enda á gotfjøðurini er um 12-14% av heildarlongdini. Høvdið er um 20% av heildarlongdini.

Eyðkenni: Hann er einasta úlvfiskaslag, ið ikki hevur skúvgarnar. Tær báðar strikurnar og tey ljósu bondini. Dimmi, reyðbrúni liturin.

Týdningur: Hann hevur ikki vinnuligan týdning.

da: Esmarks ålebrosme, en: Esmark’s eelpout, fr: Lycode de Esmarki, ís: Dílamjóri, no: Ulvefisk

Útbreiðsla: Úlvfiskur er úr Hetlandsrennuni til Íslands, Svalbarðs og í vestara Barentshavi. Í Eysturgrønlandi, í Davisfirði og frá Labrador til Cape Cod. Hann sæst javnan í veiðuni undir Føroyum á djúpum vatni.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017