Landafrøði 1-3 Lærarabók

Uppskot til frálæru Lærarabók ©Nám 2014, 1. útgáva.Týðari: Elin Henriksen, Upprunaútgáva Impuls Geografi ©2009 Peter Kinlund, Maria Bergman och Natur og Kultur, 2009, Stockholm ISBN: 978-99918-2-205-1 Landafrøði 1–3 15-2 Landafrøði 3 Asia – ein heimspartur av mótsetningum Tulka evniskort Ein áhugaverd innleiðsla at arbeiða við Asia er at taka støði í innganginum til partin í bókini (bls. 32), ið snýr seg um stóru mótsetningarnar í heimspartinum. Skriva hesi landafrøðiligu lyklahugtøk á talvuna: Náttúra Nøkur høg fjøll og áir Vakstrarøki Oyðimerkur, grasfløtur, regnskógir o.s.fr. Veðurlag Avfall og hiti Sløg av veðurlagi Monsunveðurlag, tropiskt regnskógarveðurlag, meginlandsveðurlag, oyðimarkarveðurlag o.s.fr. Nýt síðan tveir mátar at vísa mótsetningar í Asia: Kanna evniskort Lat næmingarnar leita eftir evniskortum í atlasinum, sum veita upplýsingar um nevndu evni. Lat teir skriva stuttar frágreiðingar undir hvørja av yvirskriftunum omanfyri. Ansa eftir, at næmingarnir nýta samanberandi sjónarhorn. Eru stundir, kann hvør næmingur arbeiða við øllum yvirskriftunum. Um tíðin er avmarkað, kunnu evnini býtast upp, og næmingarnir kunnu arbeiða tveir og tveir. Bólkarnir arbeiða við hvør sínari yvirskrift og leggja fram fyri hinum bólkunum. Tit kunnu taka samanum við at samanbera frágreiðingarnar hjá næmingunum. Takið støði í einum stórum veggjakorti av Asia. Tá verður lættari hjá øllum at fylgja við í samrøðuni og síggja mynstur í upplýsingunum, ið vónandi koma til sjóndar, sum framløgan líður. Greið at enda frá, hví tað sær út, sum tað ger. Kanna myndir Við at brúka myndir fáa næmingarnir ítøkiligari uppliving av ymisku umhvørvunum í Asia. Tað kann vera tíðarkrevjandi at finna góðar myndir, men tað loysir seg. Ger til dømis eina myndarøð við einum framløguforriti. Myndirnar eiga fyrst og fremst at vísa ómetaliga stóru mótsetningarnar í Asia, tá ið tað snýr seg um veðurlag, vøkstur, ymsu livihættirnar, og hvussu náttúrutilfeingið verður gagnnýtt. Landafrøði 3, bls. 23-55 www.landolia.com Google Earth