Skip to main content

Fjølmiðlar

Tíðindi

Stuttfilmur til skúlabrúks

05.05.2011

Nú verður høvið at síggja føroyskan stuttfilm í skúlanum. Nám hevur keypt rættindini at brúka filmin ‘Passasjeren’ hjá Sakaris Stórá í undirvísing á miðnámi og í elstu flokkum fólkaskúlans.

Uppgávur og sjálvur filmurin, sum varar 9 minuttir, síggjast á serligu filmssíðuni á Snar. Hepnast ætlanin væl, so verður hetta hin fyrsti av fleiri føroyskum stuttfilmum til skúlabrúks.

Birgir Kruse hevur gjørt uppgávur til stuttfilmin, sum Sakaris gjørdi á norskum filmskúla. Eisini er ein samrøða við leikstjóran, ið greiðir frá um tema í filminum, sum vann virðisløn á altjóða filmstevnu í Reykjavík í fjør.

Í uppgávunum verður nomið við almenn frásøgusnildi í filmi og víst verður til spælifilmar, har somu viðurskifti kunnu eygleiðast og viðgerast nærri.

Á filmsíðuni ber eisini til at lesa í ávegis handritum, sum leikstjórin hevur skrivað á norska skúlanum. Á henda hátt fáa vit innlit í hvussu evnið búnast og skiftir til endaliga filmin, sum nú kann brúkast í skúlanum.