Skip to main content

Danskt

Tíðindi

Darwin á Náttúrugripasavninum

05.08.2009

Í kvøld kl. 19.30 verða tveir fyrilestrar um Darwin, samfelag og mentan á Náttúrugripasavninum.

Í sambandi við, at tað í ár eru 200 ár síðan Charles Darwin var borin í heim og 150 ár síðan On the Origin of Species kom út, fara Hans Andreas Sølvará og Kirsten Brix at halda fyrilestrar í kvøld kl. 19.30 á Náttúrugripasavninum.

Charles Darwin (1809-1882) var bretskur náttúrufrøðingur. Í 1859 gav hann út kendu bókina On the Origins of Species, Uppruni veranna. Darwin segði , at plantur og dýr mennast ella broytast, sum tíðin líður, tí at tey kappast um føði og maka. Bara tey 'bestu' ella tey, ið best kundu at laga seg til umstøðurnar, liva, og tør verur, sum liva nú á døgum eru úrslit av menning, sum er milliónir ára gomul. Hetta verður kallað nátúrlig úrskiljing. Darwin fekk øði í og skelkaði í 19. øld fólk í Onglandi, tá ið hann segði sama ástøði galda menniskjuna.

Hóast ástøði Darwins er eitt náttúrufrøðiligt ástøði, so hevur tað havt stóra ávirkan á tey humanistisku vísindini, so sum søgu, heimspeki og bókmentir, og er tað í hesum høpi, at fyrilestrarnir á Náttúrugripasavninum í kvøld verða hildnir.

Hans Andreas Sølvará nevnir fyrilesturin, ið hann fer at halda: Menningarlæran hjá Darwin í heimspekiligum/vísindaástøðiligum høpi. Hin fyrilesturin, Kirsten Brix fer at halda, hevur heiti: Menningarástøði og hugmyndafrøði - Brotmynd í fýra pørtum um vald og kyn við støði í bókmentaligari viðgerð.

Sigfríður Abrahamsen