• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Kámi úlvfiskur (úlvfiskaættin)
Lycodes pallidus Collett, 1879

Stødd: Kámi úlvfiskur verður í mesta lagi umleið 26 cm langur, vanliga 15-20 cm langur.

Dýpi: Í føroyskum sjógvi er hann fingin norður av Føroyabanka á 750-800 m, og norðan fyri Føroyar millum 760-1250 m. Við Sibiria er hann á heilt grunnum vatni, 40 m ella grynri. Vanliga annars úr 60 m niður á 980 m, djúpast sunnast í útbreiðsluøkinum.

Litur: Hann hevur kámar litir, bleikt gulbrúnur um kroppin, hevur 6-8 nakað óreglulig, kám, ljós tvørbond. Gamlir fiskar hava vanliga ikki hesi bond, og teir verða eisini myrkari og javnari í litunum.

Teinar: U 18-20.

Lýsing: Kámi úlvfiskur er lítil, mjávaksin fiskur. Strikurnar eru tvær. Onnur er mitt aftur eftir síðuni og sæst ikki væl. Hin er niðari, frá oman fyri uggafjaðrarnar á skák niðureftir og nakað aftur við gotfjøðurini. Hann hevur eina ryggfjøður, sum gongur frá um hálvari uggafjøðurini og aftur á sporlsendan. Hann hevur stórar uggafjaðrar, ið eru um 11-14% av heildarlongdini. Hann hevur eina gotfjøður frá gotinum aftur á sporlsendan. Stertur er eingin, men ryggog gotfjøður renna saman aftast á sporlsendanum. Búkfjaðrarnar eru smáar, um 2 til 2,5% av heildarlongdini. Av gronini aftur til gotið eru um 41-45%, og kropshæddin við fremra enda á gotfjøðurini er um 8- 10% av heildarlongdini. Ryggjargeislarnir eru 90-93 í tali. Roðslan kemur fram til uggafjaðrarnar. Hann er roðsluleysur framman fyri ryggfjøðurina og undir búkinum.

Eyðkenni: Kámi liturin. Lítli fiskurin. Hann hevur tvær strikur.

Týdningur: Kámi úlvfiskur hevur ikki vinnuligan týdning.

da: Bleg ålebrosme, en: Pale eelpout, fr (Can.): Lycode pâle, ís: Følvi mjóri, no: Blek ålebrosme

Útbreiðsla: Kámi úlvfiskur er í tí kalda sjónum norðanfyri, í Eysturgrønlandi, á Norðurlandinum og Eysturlandinum í Íslandi, við Jan Mayen, Svalbarð og eystur til Sibiria. Hann er eisini við Kanada suður til Labrador og St. Lawrenceflógvan. Millum Ísland og Føroyar og norður av Føroyabanka. Við Svalbarð er hann fingin í sjógvi, sum er +3°C.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017