• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Rútarkongur (rútarkonagsættin)
Neocyttus helgae (Holt & Byrne, 1908)

Stødd: Rútarkongur verður upp í umleið 30 cm langur.

Dýpi: Hann er djúpvatnsfiskur úr 900 m niður á 1200 m. Vestan fyri Føroyabanka er hann fingin á 1000 m dýpi.

Teinar: R VI + 34-36; G IV + 30-32.

Litur: Hann er gráligur, kanska ljósagulbrúnligur. Kápa og fjaðrar eru dimmar.

Lýsing: Rútarkongur er smalur og høgur fiskur, umleið líka langur sum høgur, mestsum ein fýrkantur settur upp á hornið. Ryggfjøðurin og gotfjøðurin byrja á hornunum, ovast og niðast, fremst við hørðu teinunum, og síðan teir bleytaru aftur til klingruna. Hann hevur heldur smáar uggafjaðrar. Búkfjaðrarnar eru smáar. Stórur píkur fremst í teimum. Hann hevur lítlan stert, lítlan kjaft og stór eygu. Strikan er bogin yvir uggafjøðurini.

Eyðkenni: Tað sermerkta kropsskapið. Hørðu teinarnir í búkfjaðrunum, rygg- og gotfjøðurini.

Týdningur: Hann hevur ikki vinnuligan týdning.

da: Falsk havgalt, en: False boarfish, ís: Gøltur

Útbreiðsla: Rútarkongur er undir Føroyum og Íslandi til Portugals, Madeira og Asoroyggjarnar.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Pætursfiskar Zeiformes

Í Pætursfiskahópinum eru 6 ættir, 16 slektir og 32 sløg.

Undir Føroyum eru 2 ættir, ið hava eina slekt og eitt slag í part:

  • Rútarkongsættin (Oreosomatidae)
  • Pætursfiskaættin (Zeidae)

Pætursfiskarnir hava stórt høvd, ofta við skáksettum kjafti, ið kann skjótast fram.

Teir eru hávaksnir og tunnir, flestu eru stóroygdir.

Fjaðrarnar hava fleiri ella færri harðar teinar. Allir liva teir í sjónum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017