Karyatida

Frá hugskoti til list

Vit arbeiða við standmyndini "Karyatida" hjá Guðrið Poulsen.

Endamál

• At læra næmingarnar um listarliga arbeiðsgongd frá hugskoti til liðugt verk.
• At menna næmingarnar í at skapa og dokumentera egin listaverk.
• At geva næmingunum innlit í týdningin av minnismerkjum og symbolikki í list.

Evni

Vit arbeiða við standmyndini "Karyatida" hjá Guðrið Poulsen. "Karyatida", ið er staðsett í Miðstaðarlundini í Fuglafirði, er eitt minnismerki til heiðurs fyri kvinnur, sum doyðu í barsilssong. Standmyndin er ein súla, sum symboliserar styrki og minnir okkum á kvinnurnar, sum lótu lív fyri at geva lív. Standmyndin er umleið 5 metrar høg og vigar umleið 1,5 tons. Hon er gjørd úr leiri og stendur á einum fundamenti av granitti.

Arbeiðsgongd

1. Innleiðsla

• Vís filmin um arbeiðsgongdina hjá Guðrið Poulsen, har hon lýsir, hvussu "Karyatida" bleiv til frá hugskoti til liðugt úrslit.
• Diskutera við næmingarnar, hvat tey lærdu av filminum, og hvørji temu og symbolikk standmyndin hevur.

2. Hugskotsmenning

• Bið næmingarnar um at hugsa um eitt tema ella ein persón, sum tey vilja heiðra við eini standmynd.
• Lat næmingarnar gera skitsur og skriva stuttar lýsingar av sínum hugskotum.

3. Skapandi arbeiði

• Gev næmingunum leir ella annað hóskandi tilfar til at skapa sínar egnu standmyndir.
• Vegleið næmingarnar í at arbeiða við formum, teksturi og detaljum.

4. Dokumentatión

• Bið næmingarnar um at taka myndir og skriva dagbók um sínar arbeiðsgongdir.
• Lat næmingarnar gera ein stuttan film ella eina framsýning, sum vísir teirra arbeiðsgongdir frá hugskoti til liðugt verk.

5. Framsýning

• Skipa fyri eini framsýning, har næmingarnar vísa sínar standmyndir og dokumentatión.
• Bjóða foreldrum og øðrum áhugaðum at koma og síggja framsýningina.

Yrkingar í Karyatida

Í stuttfilminum hoyra vit Guðrið Poulsen lesa nakrar yrkingar upp. Yrkingar kunnu vera ein fantastiskur máti at skapa lesigleði og styrkja hugin at lesa føroyskar bókmentir. Guðrið hevur eisini útgivið eitt yrkingasavn við heitinum "Ein bein linja ein bogin", sum er ein samanseting av yrkingum og myndum. Nám hevur flokssett av savninum "Ein bein linja ein bogin", sum lærarar kunnu læna í bókasavnsskipanini MitCFU.

Minnir um nýstrokin løk
Vakurt samanløgd í skápinum
Í skipaðum løgum
Hvítir angandi dungar
Tyngdin av skipaðum hvítum løkum sum liggja still og ruddilig
Á ovastu hill í skápinum

- Blund ímillum løgini
  Blind suff

- Blóðug løk
  Broyskin segl sum standa á tambi í vindinum
  Brúðarløk
  Flættaðar rímingarleiðir
  Reivverur í rúkandi toftum
  Tey søltu tár turkað burtur við snippinum
  Umvavdir limir í fatli

- Løk á blik
  Gessig løk
  Krøkt saman í knútar

- Steinkuldin
  Líkverjan
            

vatn 
jørð 
luft 
eldur

keramikk
gerandis alkymi

at byrja frá botni av 
leirurin 
nýtt grýti

mótstøða
trekleiki  
mýkja 
duka
fet fyri fet 
fýra tons av leiri
sveittabrot
handverk
dagsverk

eitt hitastig um minuttin 
eldurin brennir

dagurin upprennur

leirurin 
nýtt grýti