Aftan á ódnina, tá ið teir 50 bátarnir gingu burtur í Føroyum, varð ein seyðamaður av Sandi varur við ein bát fyri Lokloysi.

Í bátinum, ið var fullur av sjógv, sat ein maður og styðjaði seg á árarnar.

Seyðamaðurin fór niður í Lokloysi og bað mannin røra við teirri ytru árini, men maðurin rørdi við teirri innaru, hann hevur helst verið í ørviti.

Báturin skeytst útfrá og hvølvdist.

Maðurin, ið har doyði, var Ásbjørnssonurin, sonur Ásbjørn, ið bygdi Ásbjørnsstovu í Havn.

Hesin Ásbjørn var norðmaður.     

Anton Dalsgaard, Skálavík. Úr bókini hjá Jóannesi Dalsgaard: “Søgur og søgubrot”, 1978.