Sagt er, at tveir huldubátar skulu ganga út av Skálavík, ein úr Trantinum og ein undan Horninum.

Tá ið veðrið er gott, og lot er vestaneftir, síggjast tvær bátaslóðir* úr hesum báðum plássum at ganga til havs. Viðhvørt koma tær saman, tá ið tær koma út av víkini.

Liggja hesar slóðir beint til havs, skal fiskur vera á Skálavíkshavi, men liggja tær suður um Skálhøvda, skal fiskur vera í “Suðursjónum” (Húsavíkar- og Dalshavi).

* “Slóðirnar” eru vanligar at síggja. Tað munnu vera onkrar bráðir, sortar ella tílíkt, ið koma á sjógvin í hesum støðum og hava so gjørt søguna.

Heimildarfólk: Sunniva Dalsgaard, Skálavík, ættað úr Skopun, eftir Jógvan Danielsen á Oyri, Skálavík. Úr bókini hjá Jóannesi Dalsgaard: “Søgur og søgubrot”, 1978.