Kuvait er innast í Persaflógva. Landið er lítið, og meginparturin er oyðimørk. Stórar oljukeldur hava gjørt Kuvait oyurríkt, og oljuídnaður er høvuðsvinna. Í 1990 tók Irak Kuvait. Innrásin var atvold til Flógvakríggið, tá ið altjóða herlið við USA á odda róku irakar norður um aftur markið.
 
Áðrenn olja varð funnin í Kuvait í 1940 árunum, var landið fátækt og lítið framkomið. Men stóri oljuútflutningurin hevur gjørt tað til eitt av ríkastu londum í heiminum. Lívskorini eru góð fólkið rindar ikki skatt, og skúlagongd, sjúkraviðgerð og mangar aðrar samfelagsveitingar eru ókeypis. Ovurstóra ríkidømið í Kuvait sæst eisini aftur í t.d. dýrum bilum og stórslignum byggingum, sum vatntornunum í høvuðsstaðnum.

Irakska innrásin var sonn vanlukka fyri Kuvait. Tá ið irakar tóku seg aftur, settu teir eld á nógvar oljubrunnar, og fekk hetta álvarsligar avleiðingar fyri alt har um vegir og búskap landsins. Nógv olja rann í havið, og fuglar og sjódýr doyðu. Nógv spreingievni og óbrostnar minur lógu eftir í oyðimørkini. Enn er ikki liðugt at rudda upp eftir flógvakríggið.