Tá val er fráboðað til løgting, fólkating, ella kommunu, er vanligt at veljarakanningar verða gjørdar. So frætta vit í tíðindunum um úrslitið av kanningunum og hoyra kjak millum tíðindafólk og ymisk fakfólk.

Á myndini sæst ein kassi við atkvøðum til kommunuvalið í Havn í 2008.

Í hesum undirvísingaruppleggi viðgera vit spurningin, um metingar og kanningar skulu verða loyvdar undan valinum, og um tær munnu ávirka ella vegleiða veljaran.

Í lógini stendur at valið er loyniligt. Men tá valið nærkast, eru fleiri fyritøkur, sum bjóða sær til at gera veljarakanningarnar fyri fjølmiðlarnar. Framgangsmátin er oftast tann sami. Fyritøkurnar ringja til fólk og spyrja í telefonini, um tey kunnu tosa við tann, sum síðst hevði føðingardag og hevur rætt at velja. So kunnu tey spyrja um tann spurdi var á vali síðst, um hann ella hon ætlar á val hesa ferð, um tað er gjørt av, hvør verður valdur og so framvegis.

Onkuntíð spyrja fyritøkurnar eisini um onnur viðurskifti, sum tey kanna fyri onkran annan, kanska ein handil.