Fólk hava búð í Miðvági síðan umleið 1400. Tey fyrstu mongu hundrað árini livdi fólki í mestan mun av jørðini og útróður í árabátum var eitt ískoyti til gerandisdagin. Fólkatalið var støðugt, og í 1801 búðu 145 fólk í Miðvági.

Í 1800’talinum, tók fiskivinnan seg fram í Føroyum, og fleiri fingu atgongd til jørðina. Í Miðvági vóru góðar umstøður til fiskivinnu, og fólkatalið vaks. Í 1850 búðu 260 fólk í Miðvági, og tá ið farið var inn í 1900'talið búðu umleið 500 fólk í Miðvági. 

Skip vóru keypt til bygdina, og fiskaframleiðsla tók seg upp. Í 1920’unum var fyrsta havnarlagið bygt, og tað var bygt út í 1960’árunum. Tá var flakavirki Snarfrost eisini sett á stovn, og var tað eitt sera týðandi arbeiðspláss í Miðvági í nógv ár, og framvegis verður fiskur virkaður í bygdini.

Seinastu 50 árini hevur flogvøllurin verið eitt týðandi arbeiðspláss í Vágum, og flogvøllurin tryggjaði eisini gott ferðasamband til hinar oyggjarnar í Føroyum. Fólkatalið vaks alt 1900’talið, fram til kreppuna fyrst í 1990’ununum, tá ið fólkatalið minkaði frá 1050 niðurum 900.

Í 2002 kom undirsjóvartunnil millum Vágar og Streymoy, og vágafólk fingu góðan møguleika at arbeiða á meginlandinum.  Tað hevur verið við til, at Miðvágur hevur fingið sín part av fólkavøkstrinum í hesi øldini.

Í dag er alifyritøkan Hiddenfjord eitt týðandi arbeiðspláss í Miðvági og hinum bygdunum í Vágum. Eisini er nógv arbeiði í skúlum, dagstovnum og í eldrarøkt.

Seinastu árini hevur ferðavinna eisini tikið seg fram sum ein vinnuvegur í Miðvági. Fjallavatn, forbergið Trælanípan, Bøsdalafossur og gamla húsið í Kálvalíð eru millum væl vitjaðu støðini.