Døkkhávur (ljóshávaættin), Colletts búksvarti hávur
Etmopterus princeps Collett, 1904

Stødd: Døkkhávur verður í mesta lagi 80 cm langur.

Dýpi: Hann er úr 300 m og kanska djúpari enn 2000 m.

Litur: Hann er einlittur dimmbrúnur um allan kroppin. Afturkanturin á  ryggfjaðrunum er ljósari. Píkarnir eru nakað gjøgnumskygdir, teir eru hvítir og svartir innií.

Lýsing: Døkkhávur hevur tvær ryggfjaðrar, tann fremra er minni. Píkur er framman fyri ryggfjaðrarnar, tann fremri er minni, umleið helvtina av aftara. Høvuðbreiddin er størri enn longdin úr kjaftinum í trantin. Kjafturin er næstan beinur. Heysurin er flatur omaná, og gronin er eitt sindur kílaskapað. Hann hevur stór eygu. Búkfjaðrarnar eru umleið líka stórar sum aftara ryggfjøður. Búkfjaðrarnar eru eitt lítið sindur fremri enn fremri endi á aftaru ryggfjøður. Hann hevur andahol aftan fyri og nakað oman fyri eygað.

Eyðkenni: Døkkhávur minnir mest um svartháv, men kennist frá honum m.a. á tí, at festið á búkfjaðrunum ikki røkkur aftur undir aftara píkin, og at liturin er brúnligari.

Týdningur: Hann hevur ikki vinnuligan týdning.

da: Lyshaj, en: Greater lantern shark, fr: Sagre rude, ís: Døkkháfur, no: Stor svarthå