Skip to main content

Flaggdagur 25. apríl

 

Flaggdagur verður hildin 25. apríl at minnast, at bretska stjórnin seint á kvøldi tann 25. apríl í 1940 í BBC gav boð um, at føroysk skip skuldu sigla undir føroyska flagginum Merkinum.

Longu í 1919 varð Merkið fyrstu ferð borið fram av føroysku studentunum Jens Olivur Lisberg, Janusi Øssurssyni og Paula Dahl í Keypmannahavn.

Í 20-árunum fóru fólk at flagga við Merkinum, og hóast tað ikki var loyvt at brúka "Merkið", so vant tað upp á seg í 30-árunum.

Hetta hevði við sær flaggstríð í Føroyum, sum vardi øll árini, til Føroyar vórðu hertiknar av bretum í 1940.

Tann 9. apríl varð Danmark hertikið av týskarum, og longu sama dag flaggaði sluppin "Eysturoyggin" við Merkinum.

Føroyar vórðu hertiknar av bretum 13. apríl, og bretar góðtóku ikki, at føroysk skip sigldu undir Dannebrog.

Danski amtmaðurin, Cai A. Vagn-Hansen, vildi ikki at føroyingar skuldu flagga við Merkinum og bretski konsulin Frederic Cecil Mason skeyt upp at brúka eitt grønt flagg við hvítum krossi.

Tá hesi tíðindi bórust, varð skipað fyri fólkafundum og kravgongum í Havn, og tann 25. apríl hoyrdist endaligu boðini úr Bretlandi í BBC, um at føroysk skip skuldu flagga við føroyska flagginum.

Síðan 1947 hevur 25. apríl verið hildin sum flaggdagur føroyinga, og Merkið hevur verið viðurkent sum tjóðarflagg føroyinga.

 

Næmingar í Lítlaskúla syngja flaggsangin

Í 1920 yrtki Hans Andrias Djurhuus “Kvæðið til Merkisins”, ið er flaggsangurin, sum vit kenna undir heitinum “Sjá, tú blánar”. Her syngja næmingar í Lítlaskúla í Havn flaggsangin í nýggjari upptøku, sum Árni Øregaard gjørdi fyri Nám í 2021.

Les meira »

 

 

Dagarnir undan at »Merkið« varð góðkent

Í heimildarsendingini Sjá tú blánar í Kringvarpi Føroya og í bókini Flaggsøgan Merkið eftir Niels Juel Arge verður dagarnar undan Merkið varð góðkent lýstir og viðgjørdir.

Les meira »

Tekna eina Merkistekning

Undirvísingargongd: Tosað verður fyrst um, hvar tað er vanligt at brúka Merkið, og síðan tekna næmingarnir eina tekning við Merkinum á.

Les meira »

 

 

Kunnu vit rokna við »Merkinum«

Eitt sett við rokniuppgávum um Merkið. Millum annað verður neyvt lýst, hvussu Merkið verður teknað í rættari stødd. Petur Zachariassen fyrrverandi lektari í Støddfrøði á Fróðskaparsetri Føroya gjørdi uppgávusettið í 2009.

Les meira »

Danin og indianarin

Joe Rosenthal (1911-2006) tók myndina av amerikansku hermonnunum, sum eftir krígslok í 1945 settu Stars and Stripes á japansku oynna Iwo Jima. Ovastu hondina eigur indianarin Ira Hayes.

Tummas Napoleon Djurhuus (1928-1971), kallaður Tonglatummas, yrkti um danan Ishoy, ið var hin einasti at mótmæla føroyska flagginum á Tinghúsvøllinum í 1940. ”Ishoy in memoriam” er í savninum Og dansurin gognur, sum kom út í 1958. Fyri savnið fekk høvundurin bókmantavirðisløn M. A. Jacobsens.

Les meira »