EVROPA
21
serliga um veturin. Turrast er í Landsynningsspania. Í
býnum Almeria regnar í miðal einans 200 mm um árið.
Í Tórshavn er avfallið í miðal 1400 mm um árið, sum er
næstan 3 ferðir so nógv sum t.d. í Lissabon ella í Róm.
Menniskjan ávirkar landslagið
Stóra fólkatalið í Evropa hevur gjørt, at menniskjan
hevur stóra ávirkan á landslagið. Upprunaliga var alt
skógarvaksið, men nú er í staðin landbúnaður, ídnaður,
býir og vegir.
Í teimum norðastu økjunum, har færri fólk búgva,
er landslagið ikki broytt líka nógv. Í Norðursvøríki og
Norðurnoregi hava tey reindýr, sum ganga á beiti. Tað
ávirkar landslagið, men kortini verður fjallalendið har
vanliga hildið at vera villiniland. Teir stóru skógirnir
norðarlaga í Russlandi eru so at siga órørdir av manna
hond. Har er so víðlent, at tað er alt ov langt at flyta
timbur, til at tað loysir seg at hava skógarvinnu. Bara
í teimum støðum, har tey hava funnið virðismiklan
málm, eru býir komnir, og landslagið er stórliga broytt.
Einaferð í tíðini var meginparturin av Evropa fjaldur
av leyvskógi, men nú eru næstan allir skógir burtur. Í
staðin er komin landbúnaðarjørð og bøur, har neyt,
seyður og geitir kunnu ganga á beiti.
Í Suðurevropa, við Miðjarðarhav, er skógurin næstan
fullkomiliga hovin, millum annað tí at seyður og geitir
ganga á beiti. Í staðin veksur har eitt serligt miðjarðar
havskjarr. Hesin runnavøkstur klárar seg væl í turki og
ringari mold. Nú á døgum eru eisini stór øki, har tey
hava plantað olivintrø, víntrø og ymisk sitrustrø, so sum
appilsintrø.
Í londunum við
Miðjarðarhavið er vanligt at
hava olivintrø og seyðahald.
Her gongur seyður á beiti
millum olivintrø á oynni
Samothraki í Grikkalandi.
