Marknaðartillaging
Place (P. 3)
193
Marknaðarlæra • Søla og tænasta
Skiftisskipan og skiftisrøð
Skiftisskipan vísir til, hvussu vøra verður skift ella býtt út og kemur
fram til brúkaran. Týdningarmikið er í hesum sambandi, at vøran
verður spjadd um skjótt og væl og við minst møguligum útreiðslum.
Skipanin er partur av marknaðartillagingini, og er tískil eitt av fleiri
vøruráðum.
Skiftisrøð sipar til millumgongdina ella teir handilsliðir, ið eru í
skiftinum. Umráðandi er, at virkini velja hóskandi skiftisrøð. Tað
ræður um, at vøran frá virkinum kemur fram til handlarnar, ið handla
við teir røttu málflokkarnar, og at tænastan á tann hátt sum mest hóvar
brúkaranum.
Skiftisskipanin er vøruskiftið frá vørugerð fram til brúkara, og í skiftis-
røðini eru teir handilsliðir, ið eru í skiftinum.
Heilsølur og smásølur
Vøran verður gjørd í virkinum. Heilsølur og smásølur, umframt onnur
umboð eru handilsliðir ella millumhandlarar. Brúkarin ella nýtarin er,
sum áðurnevnt evsti liður í vøruskiftinum, hann, ið brúkar vøruna.
Heilsøla keypir aloftast vøru beinleiðis frá virkjum, ið hava tilvirkað
vøru í stórum nøgdum, ofta borðbúna til brúkaran, og selur síðani
smásølum vøruna. Heilsøla hevur eisini vøru niðurfyri og hevur um-
framt ein týðandi leiklut í fíggingarkervinum fram til brúkaran. Ein
annar týðandi táttur í skipanini er, at heilsølan javnan leiðbeinir smá-
sølunum, leggur teimum lag á og ráðgevur um nýggjar vørur og vøru-
flokkar.
Smásølan er seinasti liðurin í millumgongdini fram til brúkaran. Hon
keypir vøru í stórum nøgdum beinleiðis frá virki ella heilsølu og selur
síðani brúkaranum vøruna aftur í smáum eindum og nøgdum.
Skifti, beinleiðis og óbeinleiðis
Beinleiðis skifti er, tá ið vøra ella tænasta verður seld beinleiðis
frá virki til brúkara. Tílík skiftisskipan er tann vanliga á virkis-
marknaðinum, tá ið virki letur vøru til annað virki. Trolvirki til
dømis selur útgerð beinleiðis til skip, saltsøla salt til fiskavirking, ella
brævbjálvavirki selur beinleiðis til onnur virki.
Beinleiðis skifti er eisini á nýtaramarknaðinum í handverks- og
tænastuvinnuni. Skalt tú til dømis klippa tær, keypa fisk á støðni, kjøt
frá bóndanum, ella skulu húsini málast, tá er veitingin beinleiðis til
brúkaran frá virki ella veitara.
