Mánansdúgva
Mánansdúgva (lat. Columba palumbus L; da. Ringdue) er nógv størri enn bládúgva. Í litinum líkjast tær nógv, men kennast tó lætt at, av tí at mánansdúgvan hevur ein langan hvítan lit aftur frá vongknúgvanum; tær gomlu hava eisini ein avlangan ella rundan blett hvørjumegin á hálsinum — harav navnið. Í Føroyum síggjast tær sjaldan og mest einstakar; tað hendir tó, at tær koma upp ímoti 20 í flokki.
Føturnar á dúgvu eru setuføtur, men nógv tjúkkari enn á smáfugli; og tí at teir eisini eru sera stuttir, hava tær eitt margháttligt gongulag, duffa framyvir, hvørja ferð tær stíga til.
Úr: Mikkjal á Ryggi: Fuglabókin, Dýralæra II. 1951.