Vørukurv

Nýggja bókaheildin Rokning hevur verið væl móttikin úti í skúlunum. Nógvar positivar afturmeldingar hava verið, og sum heild taka lærarar væl undir við nýggja mátanum at arbeiða við støddfrøðini í fólkaskúlanum.

Fyrstu fýra bókaheildirnar eru ætlaðar byrjanardeildini, t.v.s. til og við 3. flokki. Tað ger, at nummarið á bókini ikki hevur samsvarað við floksstigið, og hetta hevur verið eitt sindur ørkymlandi. Vit hava tí valt at nevna fýra tær fyrstu bókaheildirnar 1a, 1b, 1c og 1d í staðin fyri 1a, 1b, 2a og 2b. Innihaldið er kortini tað sama.

Tilmælið, nær bøkurnar verða nýttar, sær nú soleiðis út:

• Rokning 1a og 1b        í forskúla, skúlabólki ella fyrsta flokki.
• Rokning 1c og 1d        í fyrsta flokki (aftan á 1a og 1b). (Eisini ber til at goyma 1d til annan flokk)
• Rokning 2a og 2b        í øðrum flokki.
• Rokning 3a og 3b        í triðja flokki.

Eitt, sum lærarar hava saknað við nýggju bókaheildini, er tilfar, sum næmingarnar sjálvir kunnu arbeiða við, umframt tað, sum er at finna í Avritsmappu 1-4. Hetta hava vit tikið til eftirtektar og hava givið út uppgávubøkur til bókaheildirnar. 

Uppgávubókin er skipað eftir evnum við somu kapitlum sum grundbøkurnar. Til hvønn kapittul í Grundbókini er altso ein samsvarandi kapittul við sama fakliga innihaldi í Uppgávubókini.

Uppgávubókin hevur sama bygnað og sum heild somu sløg av uppgávum sum Grundbókin. Soleiðis er Uppgávubókin eisini væl egnað til heimaarbeiði.