Á undirvísingarportalinum Snar er nýtt tematilfar um holocaust og onnur fólkadráp, sum Nám hevur gjørt til hádeild í fólkaskúlanum og miðnám. Tilfarið liggur alment frammi til lærarar og næmingar at brúka.

Seinastu fimm árini hevur Nám, umframt undirvísingartilfar um fólkadráp, eisini skipað fyri serligum skúlatiltaki á holocaustdegnum. Tiltakið varð fíggjað við serjáttan til endamálið.

Í ár er fíggjarstøðan broytt, og orsakað av áløgdum sparingum kann Nám ikki skipa fyri holocausttiltakinum. Vit vildu fegin bæði gjørt tematilfar og skipað fyri tiltaki í sambandi við holocaustdagin. Holocausttiltakið kostar á leið 100.000 krónur umframt arbeiðsorku, og støðan í ár er, at fígging bara er til sjálvt undirvísingartilfarið um holocaust og fólkadráp. 

Vit skulu læra um og av søguni, og tað er týdningarmikið, at vit hava undirvísing í skúlunum um fólkadráp. Við tematilfarinum hjá Námi á undirvísingarportalinum Snar ber framvegis til hjá skúlunum at skipa undirvísing um holocaust og onnur fólkadráp.